Caumount devèn óuficialamen uno ‘ciéuta mistralenco’

En estiéu de 2024, la coumuno avié demanda l’atribucioun dóu labèu ‘Ciéuta mistralenco’ pèr demoustra soun engajamen poulitic en favour de la lengo d’O. Despièi la signaturo de la charto lou 29 de mars d’aquest an, Caumount es labelisado, coume la vilo de Caroun 15 jour avans.

Uno de mai ! Caumount fai partido di 14 vilo de Vau-cluso que volon recebre lou labèu ‘Ciéuta mistralenco’. Lou doursié fuguè inicia pèr l’ajoun à la culturo Enri Garcia emai Daniè Vernet, lou presidènt de l’assouciacioun felibrenco Parlaren Caumount. Prenguè un pau mai de 6 mes d’ana e veni pèr lou faire estruire e óuténi l’acord dóu Counsèu di Ciéuta mistralenco, pièi pèr fica la dato de signaturo.

Encourajado pèr lou Felibrige, la municipalita s’endraio dins la valourisacioun de soun identita. Aquéu labèu es tras que benvengu dins un cantoun que veguè nàisse lou mouvamen lou mai trelusènt pèr la lengo nostro. Es-ti necite de vous remembra que l’assoucioun dóu felibrige fuguè creado en 1854 à Castèu-Nòu-de-Gadagno ? Caumount estènt a la periferìo la mai procho d’uno dinamico prouvençalo vièio de mai de 160 an, lou labèu apielo soun dardaiamen istouri. D’eitant mai que de felibre coume Auziaz Jouveau, Adòufe Dumas e Pèire Vouland countribuiguèron à la vido literàri e culturalo de Caumount.

« Es un devé pèr nautre »

Claude Morel, conse de Caumount

La coumuno de Caumount se pòu regaudi de la proumoucioun recouneigudo de sis acioun, mounte lou prouvençau benefìcio d’uno bello vesibilita. “Aquelo labelisacioun es uno recouneissènço emai uno recoumpènso pèr tóuti lis esfors que fasèn, pèr manteni e afourti nòsti tradicioun prouvençalo” asseguro Claude Morel, lou conse de Caumount. Lou jour de la signaturo de la charto, lou permier elegi de la vilo afiermavo sa “counvicioun”. E dins sa dicho ramentavo au mounde qu’“es un devé pèr nautre elegi e ciéutadan” de trasmetre tout ço que nous demoro coume valour, de faire lou liame di racino enjusqu’i branco de nosto culturo.

Amado Roumejoun Cros

Pèr n’en saupre mai sus lou founciounamen dóu labèu ‘Ciéuta mistralenco’, poudès (tourna) legi aqueste article : https://www.echodumardi.com/dossier/a-caromb-le-patrimoine-provencal-se-conjugue-au-futur-avec-les-cieuta-mistralenco/